Fossvogskirkjugarður tók við af Hólavallagarði sem kirkjugarður Reykvíkinga. Hann var vígður árið 1932. Hvað eru mörg ár síðan?
Í elsta hlutanum eru leiðin yfirleitt afmörkuð með steyptum veggjum. Þá var líka leyft að gróðursetja tré á leiðunum. Margar tegundir trjáa vaxa í Fossvogskirkjugarði og eru mörg orðin mjög stór. Sums staðar er næstum því dimmur skógur. Mosi og fléttur eru áberandi á veggjum, legsteinum og líka trjánum.
Það er hægt að gleyma sér í kirkjugarðinum við að rannsaka lífríkið og einnig velta fyrir sér fólkinu sem þar er grafið. Stundum kemur fram hvað það starfaði.
Sólland er svæði sem sérstaklega er ætlað fyrir duftker. Í gamla daga var þar bær sem hét Sólland. Er það ekki fallegt nafn?
Til viðbótar við að í kirkjugarðinum vaxa mörg tré er þar rólegt. Það er gott fyrir skógarfuglana, enda sækja þeir þangað. Þéttleiki skógarþrasta er óvíða meiri.
Náttúrurannsóknir
Það sem mætti rannsaka í Fossvogskirkjugarði:
- smádýr, ánamaðka og snigla
- fléttur
- fugla
- gróður (mosa, tré og minni plöntur – meðal annars sumarblóm)
- kanínur!
KENNARAR / FULLORÐNIR
Fossvogskirkjugarður tók við af Hólavallagarði sem aðalkirkjugarður Reykvíkinga árið 1932. Nú er Gufuneskirkjugarður tekinn við því hlutverki.
Í kirkjugarðinum
Í kirkjugarðinum mætti skoða ýmsar garðaplöntur. Þær eru oft stórgerðar og plöntulíffæri greinileg, s.s. fræ, fræflar, frævur, krónublöð, bikarblöð, lauf o.s.frv. Gera mætti úttekt á lögun laufblaða og finna hvað tiltekin lögun kallast (sjá plöntuhandbækur).
Í kirkjugarði er auðvelt að setja upp fjölbreytt verkefni sem tengjast ýmsum sviðum. Velta má fyrir sér hvort betur er hirt um nýlegar grafir en þær sem eldri eru, reikna út aldur hinna látnu, skoða hvort litur blóma tengist kyni þess er liggur í gröfinni, velta fyrir sér fjölskyldum, stöðu og jafnvel atvinnu.
Krakkarnir gætu sjálfir fundið upp á verkefnum þar sem viðfangsefnið er kirkjugarðurinn.