Með samstilltu átaki væri hægt að laga þetta!

Því miður ganga jarðarbúar á auðlindir Jarðar. Við það rýrna þær og komandi kynslóðir og aðrar lífverur hafa ekki sömu möguleika og við höfum til að njóta þeirra og nýta.

Tala mætti um þurrðardag þegar árleg framleiðsla Jarðarinnar gengur til þurrðar. Þá er það klárað sem hefði þurft að endast allt árið! Eftir þurrðardaginn byrjum við að aféta aðra; komandi kynslóðir og aðrar lífverur.  Árið 2024 var þurrðardagurinn 1. ágúst, þá var neyslan svo mikil að það hefði þurft mun stærri hnött en Jörðina til að standa undir henni.

Mannkynið gæti haft nóg ef gætilega væri farið með auðlindirnar og þeim ekki sóað. Þess má geta að þriðjungur af framleiddum mat í heiminum eyðileggst eða er hent. Alvarleg sóun er sömuleiðis á textíl, plasti og svo mörgu, mörgu öðru….

Þurfum við að kreista Jörðina? - (WmC)

Sjálfbærni

Sjálfbærni og sjálfbær þróun getur hjálpað okkur út úr þessum hremmingum. Þegar auðlind er nýtt á sjálfbæran hátt rýrnar hún EKKI.

Markmið sjálfbærni er að fólk uppfylli þarfir sínar án þess að draga úr möguleikum komandi kynslóða til að gera það líka.

Sjálfbærni vísar ekki einungis til náttúrugæða, heldur einnig til efnahags og þess hvernig lifað er í samfélagi við annað fólk.

Vistspor

Vistspor er mælikvarði á hve mikið af gæðum Jarðar fólk nýtir og hve miklum úrgangi og mengun það skilar frá sér. Því meiri neysla, þeim mun stærra er vistsporið.

Það er ólíkt eftir þjóðum hversu mikil neysla og sóun er. Sumar þjóðir ganga mjög á forða Jarðar. Því miður er vistspor Íslendinga mjög stórt.

  • Hvað felst í sóun? Nefnið fjölbreytt dæmi.

  • Hér getið þið skoðað fyrri þurrðardaga. Árið 2020 stingur í stúf, af hverju ætli það sé?

  • Safnið hugmyndum og skráið leiðir til að draga úr sóun og seinka þurrðardeginum. Setjið einhverjar fram myndrænt og sendið!

>

KENNARAR / FULLORÐNIR

Vefir um sóun og neyslu

Hér eru mjög góðir og aðgengilegir vefir sem fjalla um sóun og neyslu – einnig kennsluefni:

Rit um grunnþætti menntunar

Sjálfbærni er einn grunnþátta menntunar – SKOÐA

Alls konar spor

Hvað er átt við með hugtökunum kolefnisspor, sótspor og vistspor? – Lesa grein á Vísindavefnum

Þurrðardagur

Góð grein sem tengist þurrðardegi 2021: Jörð í kófi eftir Ólaf Pál Jónsson, birt á Kjarnanum 9. ágúst 2021.

HÉR má sjá hvenær þurrðardagar væru ef allir höguðu sér eins og tilteknar þjóðir. Þess má geta að Ísland er ekki með. Fróðlegt væri að vita hvers vegna.