Urta með kóp - (JÓH).

Selir eru sjávarspendýr.

Vonandi sjáið þið einhvern tímann raunverulega lifandi seli við strendur Reykjavíkur, eða annars staðar. Neðst á síðunni eru spurningar sem hjálpa ykkur að skoða þá vel og fylgjast með þeim.

Við strendur Íslands kæpa tvær tegundir sela: landselur og útselur. Bæði land- og útselur eru á válista. Landselur er í bráðri hættu og útselur í hættu.

Selir kæpa ekki í Reykjavík eða nágrenni, enda of mikil truflun á þeim slóðum. Þeir eru viðkæmir fyrir ónæði. En selir eiga það til að þvælast um Sundin bláu. Alltaf er gaman að sjá þá – og stundum mætti halda að þeir hafi gaman af að fylgjast með fólkinu uppi á landi. Hvað haldið þið?

brimill – karlkyns selur
urta – kvenkyns selur
kópur – afkvæmi sela

Selir eru ótrúlega SÆTIR!

Hér er fræðandi efni um seli:

Ég hef séð seli í Húsdýragarðinum!

Á vettvangi

Fylgist vel með sel sem er úti í sjó eða upp á landi. Eftirfarandi spurningar hjálpa ykkur að gera það markvisst.

  • Hvað er hann að gera?

  • Sér selurinn eða heyrir í ykkur? Hvernig vitið þið það? Prófið að spila fyrir hann á hljóðfæri, t.d. flautu.

  • Sjáið þið hann éta? Hvað ætli selir éti?

  • Flestum finnst selir fallegir. Hvað er fallegt við þá? Hvernig eru þeir á litinn?

  • Eru selir með hendur eða fætur?

  • Líklega sjáið þið selinn fara í kaf. Takið tímann hvað hann er lengi og hversu oft hann fer í kaf. Hugsanlega mætti finna meðaltímann. Gerir hann eitthvað annað?

  • Hvað ætli selir sjái neðansjávar?

  • Sjáið þið seli á landi (í fjöru eða á skeri)? Lýsið hreyfingum þeirra eða hermið eftir þeim.

  • Ef þið sjáið fleiri en einn sel, takið þið þá eftir einhverjum samskiptum þeirra á milli?

  • Getið þið greint hvort um er að ræða brimla, urtur eða kópa?

>

KENNARAR / FULLORÐNIR

Selir koma alltaf af og til að ströndum Reykjavíkur. Höfundur hefur séð þá við Ægisíðu og Skerjafjörð og algengt er að sjá þá á skerjum í Blikastaðakró neðan Staðarhverfis í Grafarvogi.

Í framhaldinu af verkefnum hér að ofan mætti gera eftirfarandi (eftir þroska og stöðu barnanna):

  • Skoða ýtarefni um seli – leggja áherslu á að skoða og ræða um myndir.

  • Leika seli og líkja vel eftir þeim. Fara fyrst yfir hvað selir gera.

  • Teikna selafjölskyldu. Fara fyrst yfir útlitsmun kynja og afkvæma.

  • Birta niðurstöður athugana í skýrslu eða sem skjásýningu.

  • Kanna kortasjá sem sýnir selalátur við Ísland á vef Náttúrufræðistofnunar.

  • Útbúa fræðslubækling um seli.