Grjót
Á Gufuneshöfða er stórgrýti og jökulminjar.
Jöklar ísaldar skriðu á Gufuneshöfða og fluttu til hnullunga. Nóg er þar af grjótinu. En það var ekki bara jökull sem flutti til grjótið og pússaði. Sjórinn gerði það líka. Við lok jökulskeiðsins náði sjór langt upp á land og mestur hluti Reykjavíkur var undir sjó. Þá var Gufuneshöfði eins konar sker.
Á stöku stað má sjá grjót með býkúpuveðrun (sjá umfjöllun í tengslum við Öskjuhlíð).
höfði = hátt nes, sem gengur fram og gnæfir yfir sjó, vatn eða undirlendi
Það eru víða hættur í klettunum, einkum næst ströndinni. Á og við Gufuneshöfða verður að fara varlega.
Líf
Á Gufuneshöfða er gaman að skoða grjótið, en þar er líka áhugaverður villtur holtagróður. Þar er þó lúpínan frek og hefur of víða náð yfirhöndinni.
Grjót skapar ákveðnar aðstæður fyrir lífverur. Í kringum það helst raki, undir því er myrkur og í sólinni myndast í því hiti. Mikið er um smádýr við grjótið, plöntur vaxa við það og fléttur á því. Það er margt að skoða.
Vernd
Gufuneshöfði er á náttúruminjaskrá og einnig nýtur hann hverfisverndar Reykjavíkurborgar. En það er ekki bara höfðinn sjálfur sem um er að ræða heldur einnig fjaran og grunnsævið vestur frá Gullinbrú og að höfðanum.
Af Gufuneshöfða er gott útsýni yfir Sundin blá.
Gróðurinn
Sumar tegundir plantna sækja í aðstæðurnar nálægt grjótinu. Takið eftir hvernig gróðurinn vex næst steinunum. Hvaða plöntur sjáið þið?
Fléttur
Rannsakið líka flétturnar.
Smádýr
Þið finnið örugglega smádýr nálægt grjótinu. Raki við steina gerir sumum tegundum fært að lifa á svæðinu. Sjá nánar umfjöllun um smádýr.
Náttúruvernd
Veltið fyrir ykkur og ræðið: Fjörunni, sem er á náttúruminjaskrá og hefur hlotið vernd hjá Reykjavíkurborg, hefur talsvert verið raskað. Þar er hjólastígur og víða landfylling. Fjaran við Gufuneshöfða VAR mjög falleg og þar áttu ýmsar fjörulífverur og fuglar sitt búsvæði.