Á ruslahaugum
Þegar Reykjavík var agnarlítill bær voru ruslahaugar þar sem nú er Hljómskálagarðurinn. Þegar hugmyndir um garð á þessum stað komu fram var í fyrstu lítið gert annað en að taka svæðið frá. Ekki voru til peningar til að hefjast handa.

Erfiðar aðstæður
Framkvæmdir hófust svo árið 1914. Það var ekki auðvelt að rækta tré á ruslahaugum, það var sannarlega ekki góður jarðvegur sem blandaður var alls konar drasli. Á svæðinu var einnig opið fyrir köldum vindáttum. Framan af gekk garðyrkjan ekki vandræðalaust. Einnig var kvartað undan umgengni fólks sem henti drasli í Tjörnina og skautafólks sem traðkaði á trjáplöntum!

Stór og myndarlegur
Núna, meira en 100 árum seinna, er garðurinn heldur betur fallegur og gróður dafnar vel – og fólk gengur vel um. Hljómskálagarðurinn er með stærri almenningsgörðum í Reykjavík og þar eru oft hátíðarhöld, til dæmis á Menningarnótt og 17. júní.

Góð hugmynd - (SH).
Fyrstu skrefin í Hljómskálagarðinum - árið er 1965 - (HG).
Nafn garðsins tengist Hljómskálanum, en þar er æfingastaður lúðrasveita. Hljómskálinn var byggður 1923 - (SH).
Tilkomumikið blómabeð í Hljómskálagarðinum snýr út að Hringbraut og blasir við þeim fjölmörgu sem eiga leið þar um - (SH).

Þorsteinn Magni Björnsson garðyrkjumaður sem er umsjónarmaður Hljómskálagarðsins er skapandi og notar til dæmis málverk sem innblástur þegar hann velur liti og blóm í beðin. Bogadregnar línur eru honum að skapi. „Mér finnst þetta mjög róandi garður. Ég finn ekki fyrir því þó allt í kring sé umferð. Ég kalla hann stundum friðargarðinn,“ segir hann.

Garðar
  1. Skoðið Hljómskálagarðinn. Ímyndið ykkur ólíkt fólk sem á leið um garðinn. Hvað ætli höfði sérstaklega til þess? Hvað finnst þér mest spennandi? (Steinahæðin höfðar víst ennþá mest til litlu stelpunnar á myndinni.)
  2. Skoðið blómabeðið sem snýr að Hringbrautinni. Hverjir eru litirnir í ár og er hægt að lesa eitthvað úr myndinni sem blómin skapa?
  3. Í Hljómskálagarðinum er afgirt blómaengi – skoðið skiltið og veltið fyrir ykkur tilganginum.
  4. Í Hljómskálagarðinum má rannsaka gróðurinn, fuglana, smádýrin, fólkið, landslagsarkitektúr og svo margt fleira. Þar má líka fylgjast með flugvélunum sem fljúga yfir. Í Hljómskálagarðinum má líka hafa það huggulegt og borða nesti, leika sér eða mála málverk. Hvað viljið þið gera?
  5. Í Hljómskálagarðinum eru margar styttur. Skoðið þær vel og veltið fyrir ykkur. Sumar er auðvelt að tengja við umhverfið eða náttúruna almennt. Jónas Hallgrímsson sleit til dæmis upp blóm!
>

KENNARAR / FULLORÐNIR

Framkvæmdir í Hljómskálagarði

Flötin, þar sem fólki er safnað saman á samkomum, verður lögð með grasþökum með slitþolnum grastegundum, álíka og er sett á fótboltavelli. Undir grasið verður komið fyrir vökvunarkerfi svo hægt verði að sinna grasflötinni á sem bestan hátt. Með þessu mun grasflötinn þola betur álag og verða viðhaldsminni en verið hefur.

Blómaengi – lífbreytileiki

Með því að draga úr slætti á grasflötum og leyfa gróðri að vaxa frjálst ná fleiri tegundir jurta að vaxa þar.  Grastegundir þola vel að vera reglulega skertar (með slætti eða í bithaga) en síður tvíkímblöðungar, sem við köllum almennt blóm. Gróður verður fjölbreyttari og gjarnan með litskrúðugum blómum þar sem ekki er slegið. Með því að slá ekki er stuðlað að lífbreytileika.

Engið í Hljómskálagarðinum er votlendi. Það er ekki alltaf sem votlendi fær sess í görðum.