Laugardalur hét lítið býli á þessum stað. Fólkið sem bjó þar ræktaði matjurtir en einnig tré og skrautblóm. Þau stofnuðu garðyrkjustöð. Seinna keypti Reykjavíkurborg af þeim stöðina og býlið.
Fljótlega eftir að Reykjavíkurborg keypti Laugardal (1955) var ákveðið að koma þar upp almenningsgarði, sem var formlega opnaður árið 1961.
Bæjarnafnið Laugardalur hefur nú orðið að örnefni í borginni sem nær yfir nokkuð stórt svæði.
Mér finnst Grasagarðurinn flottur.
Í Grasagarðinum er fræðsludagskrá í boði og þar er tekið á móti hópum, til dæmis skólahópum. Sjá vef garðsins.
Lifandi safn undir berum himni
Talað er um Grasagarðinn sem safn.
Þar er trjásafn þar sem gerðar eru tilraunir með alls konar trjátegundir, líka erlendar og athugað hvernig þeim vegnar.
Svo er safn með íslenskum blómplöntum – Flóra Íslands. Tekist hefur að láta fjölda tegunda gróa í garðinum. Það er auðvitað mikil áskorun enda þurfa þær fjölbreytt búsvæði.
- Skoðið hvað hefur verið gert til þess að útbúa fjölbreytt búsvæði svo fjölbreyttar plöntur flóru Íslands geti vaxið í garðinum. Hvaða plöntur þekkið þið og við hvaða aðstæður lifa þær?
- Hvað finnið þið margar tegundir af lauftrjám í garðinum og hvað sjáið þið margar tegundir af barrtrjám? Þekkið þið tegundirnar? Hvaða tré er ævintýralegt, sérkennilegt, formfagurt, stæðilegt, fíngert…. og svo framvegis?
Rennusteinar
Takið eftir grjótinu sem víða má sjá í Grasagarðinum, það var höggið til í höndunum og notað sem rennusteinar víðs vegar í Reykjavík áður fyrr. Þeim var komið fyrir í rásum við götur bæjarins og þangað safnaðist regnvatnið. Þegar ekki var lengur þörf fyrir steinana í götunum fengu þeir nýtt hlutverk í Grasagarðinum.
- Segið frá fuglunum sem þið sjáið. Vitið þið hvaða tegundir það eru?
- Í garðinum eru margar styttur. Skoðið þær og veljið ykkur eina til að vinna með útfrá náttúrunni.
- Allt árið um kring er margt að sjá í garðinum. Plönturnar fara í gegnum sinn lífsferil og það getur verið áhugavert að skoða þær þótt úti sé vetur. Sumar plöntur lifna við mjög snemma á vorin, aðrar standa sig langt fram á haust. Fylgist með!
- Útfærið skemmtilegan og fræðandi ratleik til þess að fara í í garðinum.
KENNARAR / FULLORÐNIR
Íslenska jurtasafnið
Upphafið að því var að hjónin Jón Sigurðsson skólastjóri Laugarnesskóla og Katrín Viðar píanókennari gáfu safn sitt með 200 plöntum sem þau höfðu safnað hér og þar á landinu. Nemendur Laugarnesskóla þurfa sannarlega að vita það!
Verkefni um gróður og garða
Minnt skal á frekari verkefni sem væri hægt að útfæra í Grasagarðinum sem sett eru fram annars staðar á vefnum: Plöntur og gróðurlendi // Garðar.
Ratleikur
Stálpaðir krakkar geta vel samið ratleik eða tekið þátt í að útbúa ratleik. Lagt er til að nýta umhverfið vel og þannig verður leikurinn bæði skemmtilegur og fróðlegur. Mikilvægt er að skilja ekki eftir dót á vettvangi að leik loknum.